Rama: Projekti në Zvërnec nuk do të prishet, resortet luksoze sjellin më shumë të ardhura
Kryeministri mbrojti investimin në Zvërnec, duke e cilësuar turizmin elitar një motor zhvillimi për ekonominë.
Kryeministri Edi Rama deklaroi se projekti për ndërtimin e resortit turistik në Zvërnec do të vijojë dhe nuk do të ndalet, duke argumentuar se investimet në turizmin elitar sjellin të ardhura më të larta për ekonominë dhe ndikojnë drejtpërdrejt në rritjen e mirëqenies.
Pas mbledhjes së qeverisë, Rama iu përgjigj kritikave që janë ngritur lidhur me ndërtimin e resortit, duke theksuar se resortet luksoze nuk janë një privilegj për pak njerëz, por një instrument ekonomik që krijon të ardhura, punësim dhe zhvillim për vendin.
“Resortet sjellin më shumë të ardhura”
Kryeministri u shpreh se ekziston një perceptim i gabuar sipas të cilit resortet luksoze nuk i shërbejnë interesit të qytetarëve shqiptarë. Sipas tij, faktet tregojnë të kundërtën.
“Duhet të përballem me njerëzit që thonë se çfarë na duhen ne resortet luksoze ose se ato nuk janë për ne. Në fakt e kundërta është e vërtetë, resortet janë ato që sjellin të ardhura më të larta, ndryshe nga turizmi i zakonshëm. Këto janë shifra që i tregon edhe ekonomia”, deklaroi Rama.
Ai shtoi se turizmi elitar është një model i provuar në shumë vende dhe se resortet luksoze kontribuojnë drejtpërdrejt në ekonominë lokale dhe kombëtare përmes shpenzimeve më të larta të vizitorëve.
Shembulli i Malit të Zi
Për të mbështetur argumentin e tij, Rama solli në vëmendje rastin e Malit të Zi, një nga konkurrentët kryesorë turistikë të Shqipërisë në rajon.
Sipas kryeministrit, ekonomia malazeze ka arritur të sigurojë paga më të larta se vendet e tjera të rajonit falë zhvillimit të turizmit me vlerë të shtuar dhe investimeve në resorte luksoze.
“Mjafton të shikoni Malin e Zi, që nuk prodhon raketa, makina apo ndonjë sektor aq të zhvilluar të teknologjisë, por prodhon turizëm dhe si shpjegohet që aty pagat janë më të larta në rajon? Përgjigjja është shumë e thjeshtë: resortet luksoze”, tha Rama.
“Nuk kam asnjë dilemë për projektin”
Kreu i qeverisë theksoi se nuk ka asnjë dyshim për rëndësinë e projektit në Zvërnec dhe se investimi duhet të vijojë sipas planit.
“Nuk kam asnjë dilemë për këtë dhe mendoj se me vetëdijen time Shqipërisë nuk duhet t’i hiqet qafe ky projekt”, deklaroi ai.
Debati për resortin në Zvërnec është intensifikuar gjatë javëve të fundit, ndërsa një pjesë e banorëve dhe aktivistëve kanë shprehur kundërshtime për ndikimin e mundshëm të projektit në zonën natyrore dhe ekosistemin lokal. Nga ana tjetër, qeveria argumenton se investimi do të sjellë zhvillim ekonomik, punësim dhe rritje të të ardhurave nga turizmi.
k.jpg)